同鄧萃雯比較 胡定欣有壓力

提到劇集的回響，黎耀祥坦言不太上網，對網上留言並不太關注，更多的是從身邊人聽取意見，他說：「有啲人會有『巾幗』情意結，成日講以前點樣，但我都話每個人都唔一樣，亦都好開心有觀眾會從劇本同人物角度去分析，都收到正面評價，話今次啲人物更加有血有肉。」而胡定欣表示聽到許多不同的聲音和意見：「當然每一次都有好同唔好嘅評論，但依家我有種新嘅諗法，就係乜嘢評論都接受，因為佢哋有睇先會評論，都係一件開心事。」當被問到不少網民將她與鄧萃雯作比較，她坦言有壓力，但也是寶貴的經驗，表示在劇集播出前已預料到，認為比較是無可厚非，自己作為演員，主要任務是演好角色。黎耀祥亦認同比較是無法避免，又提到昔日拍攝《法證先鋒III》時，也曾被拿來與歐陽震華比較。