昔日東方蕭正楠曹永廉開騷互窒 馬國明獲帶挈狂接Job
藝人蕭正楠與曹永廉前晚假佛山舉行《BRO SHOW》演唱會，兩人又唱又跳兼大講爛Gag，更邀得視帝好友馬國明擔任嘉賓，3人合唱掀起高潮。馬國明首先獨唱《發現》，並笑言：「跟住落嚟我準備咗10首歌唱畀大家聽。」此時阿廉即時制止，並叫觀眾不要走，阿蕭補充說：「佢（馬國明）話準備唱10次《發現》畀大家聽。」阿廉續指很難邀請嘉賓，並拿馬國明開玩笑：「我哋請嘉賓係唔可以靚仔過我哋，又唔可以唱得好過我哋，其實真係好難，所以搵咗個早排冇工開嘅人。」馬國明接口稱原本冇工開在家中數手指：「我話做佢哋個唱嘉賓嘅消息一出，佢哋好受歡迎，開一百場唔定開一千場唔定，可能場場都係我做嘉賓，啲人驚我之後冇期，所以即刻Book定我，電影、電視、廣告都搵我。」
唔介意3人合體開演唱會
阿蕭坦言這個騷是兄弟班演出，揚言下次可以3人合體開演唱會，阿廉指在娛樂圈難搵好兄弟，但就好易找到好老婆，指着馬國明與阿蕭說：「個個喺呢行又食又拎，正所謂喺嗰度食呢度咩㗎。」阿蕭即時反擊對方舊愛也是圈中人，大家實行互相傷害，馬國明則站在旁邊傻笑。馬國明接受訪問時大讚當晚氣氛好，榮幸能任個唱嘉賓，講到阿蕭提議3人開騷，他說：「我唔介意，我經常去賭場唱歌，我都唱45分鐘㗎，佢哋兩個拍檔得好好，我就隨緣啦！」
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
