阮小儀搭𨋢被鄰居偷拍出Po叫收手

藝人森美與太太到大阪旅行突然冇酒店房，拍檔阮小儀同樣不幸，她透過社交平台發文表示遭鄰居在電梯內偷拍，令她感到既尷尬又不快︰「話說頭先返屋企嘅時候，同一位身材肥肥哋嘅女士同𨋢，由於我掛住望WhatsApp，冇留意到佢原來偷拍中，後來因為佢個姿勢有啲浮誇，個手機鏡頭拗向我嗰邊，所以被我發現，而佢即時亦即刻轉番去手機板面，點解我知？因為架𨋢有鏡反映番我睇。當我考慮想出聲問問你點解影我呢，但你就出𨋢嘞。」

小儀回家後愈想愈不忿，於是決定出Po表達不滿︰「本來諗住忍咗佢，唔出聲，但愈諗愈唔開心同唔知佢影咗乜，所以都係不如出聲，希望你睇到之後，請你下次唔好喇，因為架𨋢啲鏡嘅反映其實好清楚睇到你做乜㗎。」她表示鄰里關係很重要：「住9樓嘅呢位女士，下次唔好咁啦，大家左鄰右里，其實打個招呼可以好平常，但偷影這回事，我就覺得唔太妥當同埋令我感到唔舒服，因為始終係自己屋苑，大家仲有機會碰面嘛，係咪？」