獨家訪問：北京亮相時裝周莊思明心郁重踏T台

無綫藝人莊思明日前獲邀到北京出席中國國際時裝周活動，並在現場接受內地傳媒訪問，同場還有藝人伍詠薇。思明以一身白色裝束亮相，大騷長腿，高貴大方。

男友同行當度假

思明接受本報獨家訪問時說：「好開心、榮幸獲品牌方邀請出席，咁大個女都係第一次去呢啲大型Fashion Week睇騷，我抱住『半放假』心情出發，因為我都有10幾年冇去北京，可以話係寓工作於娛樂，都有半日時間可以出去觀光同食吓嘢。（男友楊明有冇一齊去？）有呀！咁啱嗰幾日有時間，佢又有朋友喺北京，所以大家都有食飯，對我嚟講係一個好興奮嘅旅程。」

問思明有否想過行騷？她說：「睇騷時真係有諗番以前細個做Part Time Model啲嘢，以前未入行都有行過騷，當然冇咁大型啦！但都勾起少少行Catwalk嘅癮，當年選港姐時主題係行Catwalk，當時好多呢啲表演，所以我都有心癢癢，希望之後有機會可以再行啦！」