黃婧靈細數優點 向公司搲Job

藝人黃婧靈（波波）日前化身文青少女拍攝靚相，只見她穿上黑色恤衫，露出部分吊帶喱士小背心，大玩男友視角，惹來網民揣測她蜜運中。對此，波波昨日接受本報訪問時表示：「攝影角度真係有少少男友視角，但幫我影相嗰個係女仔。實際上，可以講係自己嘅視角，因為係我就睇完個位，再叫朋友幫我影嘅。」談到相比以往的性感造型，其文青Look都相當搶眼，她開心自認有不同市場：「我係有內涵嘅人，同埋我有好多優點嘅，譬如好努力又唔怕辛苦，溫柔又體貼等等，仲有我好捱得嘅，希望公司畀多啲機會，我會好努力咁把握。」