獨家專訪：讚「奧運新六星」有料到 何沛珈被嘲冇人識 苦幹挽聲勢

何沛珈（Roxanne）當年參選港姐與獎項無緣，於2022年挑戰《香港小姐再競選》終奪得冠軍及「更上鏡小姐」，圓了選美夢，更因此吸引到觀眾注意。樣靚身材好的她獲公司力捧，去年就開拍了3部劇，分別是《異空感應》、《痞子無間道》及《反黑英雄》。

當中近日熱播的《反》劇收視報捷，Roxanne飾演的「林冰」與視帝陳山聰外形相襯，深受觀眾喜愛。在前晚播出的一集，她因撰寫報道惹禍，遭墨西哥販毒集團首領襲擊，遭叉頸、扯頭髮，又被拖行及凌空摔到地上，她直言撞書架及被扯頭髮都痛，不過效果真實，覺得很值得，更投入到在地板爬行。她表示首次與山聰合作，對方已袋錢入她袋：「山聰叫我唔好帶住情緒做戲，唔好諗住劇情點發生，要回歸零嘅狀態。拍喊戲時唔好諗住要喊，唔好先眼紅紅去演，反而有情緒起伏位會好睇啲。」

Roxanne近日與劉穎鏇、何泳芍、鄭衍峰、孔德賢和黃庭鋒組成3花旦、3小生陣容的「奧運新六星」，問到是否期望像「舊奧運六星」林峯、黃宗澤和馬國明等做出好成績？她說：「好意外由我做，之前6子好勁。好多人話除咗劉穎鏇外，其他人都唔識，我依家唔得，將來可以靠努力令人認識，好珍惜今次機會。我知道唔可以一嚟就要大家接受，要多聽意見。」她大讚其餘「五星」都有過人之處，例如庭鋒大學時修讀體育，何泳芍就游水、潛水皆精。她自言最有信心是跑步，並指各人已開設通訊群組，以便分享資訊互相幫忙和支持，而她最希望帶出令觀眾關注運動的訊息。