殺到巴黎 被嘲失禮 姜濤AL粉絲開戰 櫈仔霸位鬥大聲

姜濤與Anson Lo日前抵達巴黎之後，即展開一連串工作，所到之處都獲得粉絲們簇擁，相當受歡迎！其中兩人亮相大型時裝騷，眾粉絲更晨早在場外擔櫈仔霸位，令一向講求規矩的法國人大感有趣，不過有網民亦指此舉失禮，希望粉絲們追星之餘，都要顧及偶像形象。

「姜神」姜濤、Anson Lo到場時都有跟眾粉絲打招呼，向來寵粉的Anson Lo更有幫「神徒」（Anson Lo粉絲）簽名，十分親民，之後他們齊齊入場，並跟韓團Seventeen成員Vernon及NCT成員Winwin影合照留念。開騷前Anson Lo更於行騷位置影Chok爆靚相，開騷後則跟姜濤一齊化身「攝影師」影模特兒行騷，睇得相當投入！除了出席活動兼睇騷，兩人亦有接受多個傳媒訪問，訪問期間，「姜神」粉絲再度出招，齊齊大嗌偶像名字，聲音更差點蓋過偶像的聲音，可知「戰情」相當激烈！

今次「姜神」法國之行，雖然非常忙碌，但都不忘與前往當地睇騷的好友、有神級填詞人之稱的黃偉文（Wyman）食飯，Wyman笑言：「上次3月倫敦茶敍已經開始夾時間6月巴黎食飯。結果又食到又食唔到又食到又食唔到反覆咗幾次，本身已經放棄咗，終於喺兩日前又突然『撈』得番（海底撈月個撈），大家犧牲瞓覺時間喺Paris 10點先開飯食到過咗半夜……」並大爆即場上演爭埋單大戰：「唯一尷尬位係，我負責book餐廳諗住請客，所以點菜時懶豪亂叫一通叫到成枱都係希望唔好待慢啲客人，結果臨尾畀人偷偷埋咗張單。下次無論喺地球上邊度偶遇，求吓你哋畀我請，好唔慣唔係有大食大畀年紀細過我嘅人請我食飯。」開心時光過得特別快，「姜神」法國之旅，昨日結束，上機前姜濤都不忘拍照留念，並於今晨抵達香港。

另外，近日Frankie女友Christy被起底，有網民大表「陰謀論」指是Anson Lo粉絲團隊出招，望Anson Lo可早日單飛，Anson Lo粉絲團隊隨即回應只是「花生友」，都是在網上追看消息。除此之外，有網民指今次Frankie累街坊，皆因他與女友的是非鬧出後，網民即於討論區再翻出其他隊員Edan及Jer疑出軌的舊帳，躺着中槍。