各自生活 否認傳言 郭晉安和平離婚 同歐倩怡傾掂數

「三屆視帝」郭晉安、陳曉華、何依婷、莊子璇及何廣沛等昨日在將軍澳電視城為新劇《金式森林》進行造型暨拜神儀式。郭晉安與歐倩怡（Cindy）月初在社交網驚爆結束18年婚姻，透露早於兩年前已經分居，最終決定離婚。公布「分訊」後首露面的安仔亦是相隔兩年後再拍劇，受訪時坦言有點緊張，講到離婚原因，他說：「呢啲係我哋兩個人之間嘅事，係因為兩方面都需要有自己嘅進程。（和平分開？）和平㗎，大家傾好晒，大家知道對方嘅嘢、Cindy都明白、仔女都明白。（仔女唔開心？）冇！依家同小朋友都一齊住，大家相處得好開心，嚟緊8月我會陪大仔去英國讀書開學。（離婚影響工作心情？）冇嘢，都已經係兩年前嘅事，大家生活得好好，各自有自己生活。（離婚牽涉第三者？）唔會！人哋猜測嘅嘢唔好理咁多，呢啲係我哋私人事。」

有指安仔兩年前分居將健康產品公司股份轉讓給家姐以避分身家，對此他說：「呢啲嘢我同Cindy已經溝通好，大家都知道咩事，所以唔需要去揣測。（贍養費有冇爭拗？）呢啲我哋兩個知道，其實有咩都係我哋兩個去溝通，大家唔使擔心，不如大家擔心我咁耐冇拍劇會唔會緊張仲好。」

陳曉華在劇中與安仔上演忘年戀，惹來網上不少討論，她也想不到大家對忘年戀有如此大反應。她稱拍拖不會考慮對方年紀，最重要是大家能溝通、對方專一、人品好，自己要找的是靈魂伴侶。講到安仔回復單身可會戲假情真？她笑說：「拍劇、拍劇，我會好認真去做呢個角色。」而首次拍劇的莊子璇則扮演安仔的女兒，對演出感到緊張，擔心演出不夠自然捱批。劇中繼母曉華笑言不准她叫阿媽，只能叫姐姐。

至於何依婷劇中拋棄羅子溢，向錢看轉投何廣沛懷抱，扮演豪門大少奶的她指演繹有難度，自言在家並不霸道，人妻也只是稱呼，仍有一顆少女心。