梁諾妍患乳腺炎恐要開刀放膿

藝人洪永城太太梁諾妍（Inez）3月誕下細女，雖然忙住開工，不過她仍然堅持泵人奶餵愛女，但因為工作不定時，令她患上乳腺炎。

前日她貼出一臉病容的自拍，原來她已經連續3、4晚高燒，半夜發冷兼骨痛無力：「諗嚟諗去都唔知點解，直到媽媽朋友話係唔係乳腺炎，我之前真係太忙，試過兩次過咗7個鐘先泵，又因為我量多嘅關係，應該已經塞咗。」Inez到醫院睇急症時，已經燒到39.7度，又表示如果太嚴重要用針抽膿，或需做手術開乳頭放膿。