方力申放話 3年內成婚

藝人方力申（小方）前晚出席英皇電影《出租家人》慈善放映，接待400位善長並成功籌得逾40萬元善款。小方日前在社交平台分享游泳影片，事後被指大晒2億豪宅，他聞言即澄清只是屋苑泳池，又表示：「啲人成日都誤會，我都講過好多次我屋企係中產，我唔係一個有錢人。（話你住2億豪宅？）唔係，係半億啫，要供㗎！」與女友葉萱感情穩定的他被問到何時結婚，他謂：「好難答，唔識答，今日白色情人節添！（咁你有咩表示？）送咗紮花囉，喺女仔角度，浪漫永遠都唔會夠。（畀依家女朋友做女主人？）預早講咗仲有神秘感嘅？相士話我未來3年唔結婚嘅話就唔使旨意結，總之未來3年就會結。」