準爸爸旺爆 露股衝國際 陳家樂培育小波牛 連詩雅佗B仔7月生得

家樂與Shiga因合作節目結緣，拍拖3年後於去年拉埋天窗，婚後經常被追問喜訊，小倆口昨日終報喜，前後腳上載BB超聲波照，以及家樂從後擁着凸肚嬌妻的「一家三口照」，Sweet爆兼幸福滿瀉！Shiga寫道：「一直都係處於平常心，同埋順其自然嘅態度，等待上天嘅安排。2024收到一份最好嘅禮物，好感動、感恩、期待Summer BB嘅來臨，祝大家元宵節快樂！家庭又變大了，有點不可思議嘅感覺，仲有點緊張將會做父母，陳生話仔女都好，都要培養佢鍾意曼聯。」

對於即將做老竇，家樂回覆：「2023年我們一起攜手踏進人生另一個階段，感恩2024年迎來我們另一個重要的時刻！我們非常期待迎接新生命的到來，並相信這一個小小的生命，將為我們帶來無限的喜悅和幸福。7月小寶寶就同大家見面，希望一切順利。」熱愛足球的他，更揚言日後與小朋友一齊睇波，而據可靠消息指Shiga一索得男，難怪家樂笑到合不攏嘴！記者昨日向他求證，他未有否認，但依然口硬：「連我媽咪都未知，同佢交代咗先啦！適當嘅機會再同大家講。」

而小生命腳頭認真好，事關家樂除憑英皇電影《出租家人》在美國影展獲頒「璀璨之星」外，同時又有另一話題作，事業有望迎來重大突破！該話題片約4成製作費獲電影發展局撥款資助，並由資深電影人關錦鵬及張叔平等負責牽頭，故事嶄新踩界，交代家樂以義工身份，為輕度智障及弱能女患者提供性服務，這類義工近年在台灣、美國及日本等地興起。家樂今次除要落髮變「寸頭」兼減磅配合角色外，戲內更首次大膽露股，與扮演腦癱病人的廖子妤有不少情慾戲。

該片於農曆新年前低調進行拍攝兼已煞科，台前幕後為戲名大傷腦筋，至今仍未有最後定案。由於造型要保密，近期家樂公開現身時均戴帽遮掩，對相關拍攝工作亦未有多作透露，不過據知拍攝相當順利，工作人員對他與廖子妤的表現讚不絕口，稍後電影將進入後期製作，雖未知上映方面的安排，但已密謀先報名衝擊柏林及康城等國際大型影展，令社會大眾對這類「性義工」有更深切了解及關注。