舌戰公堂3分鐘 王浩信唔餓得

視帝王浩信主演的無綫劇集《狀王之王》昨日迎來大結局，他與陳浩民飾演的陳夢吉上演世紀公堂戲，二人在公堂上唇槍舌劍的場口以一鏡到底方式拍攝，全長約3分多鐘，談到拍攝前準備，王浩信說：「首先要背熟晒啲對白，第二就係要食飽啲，因為真係花好多能量，基本上一拍完返到去就即刻瞓着。」講到與陳浩民合作，他說：「同佢合作感覺好正，佢嘅 energy、演戲嘅節奏同對清裝嘅拿捏都做得好好，好榮幸可以同佢做對手戲，覺得有少少相逢恨晚！」