193做厭「藥煲」

男團ERROR成員郭嘉駿（193）昨日應品牌邀請，與粉絲一起食盆菜慶新春。他直言新年以休息為主：「喪瞓，連朋友聚會都只係傾吓偈，完全冇發過新年財。（第一日開工？）係，尋晚喺度包開工利是，同大家開心Share。」記者打趣問是否「搵得多派得多」，他坦言：「唔可以咁講，以前入不敷支，根本冇錢派利是，依家終於有少少錢剩番。」談到新年願望，他表示：「呢兩年身體好差，成為『病界KOL』，明白身體健康好緊要。」他又笑言希望各廣告商尤其是運動品牌，能夠為其健康着想，請他做代言人，又指近日推掉不少工作，因為不想再客串，未來作品貴精不貴多。