姚子羚捱凍露背邂逅王浩信

藝人姚子羚在昨晚播出的無綫劇《狀王之王》中，穿上大露背裝與宋世傑（王浩信飾）上演了一場「華麗邂逅」，畫面唯美，她透露拍攝當日正值嚴寒，更全程「零暖貼」上陣：「拍嗰日真係好凍，但因為要落水都黐唔到暖包，除咗埋位前着大褸包住保暖。劇組都好好有Book暖爐畀我，放嘅都係暖水，所以浸住喺暖水度拍都還可以，唔算好凍。」她笑言是次拍攝算是「久違了的大露背」，並透露原來是「長褲」變「短褲」：「場戲我要着住肚兜加短褲仔，原本條褲再長啲，但因為拍咗出嚟覺得冇乜美感，所以即場轉做短褲，至於大露背嘅戲我其實都好耐冇咁拍過，不過最緊要拍出嚟靚。」