泳兒揸車慢 遭狂砵舉中指

歌手泳兒早前推出新歌《無能 為力》，自認性格「唔認輸」，所以在疫情時因其父「睇死」她考不到車牌，而改變了生活習慣。日前她在專訪時表示：「爸爸話我揸唔到車，我就去考牌同買咗車，以前因為冇車所以好少出街，但依家有車就可以成日周圍去。」她自問是「世紀級安全駕駛者」，皆因其車速較慢，曾慢到被其他駕駛者粗口相待，她說：「嗰次紅燈轉綠燈，我慢咗一秒開車之嘛，就畀人響按狂『砵』，嗰個司機仲對我舉中指，不過我冇嬲，唔理佢就得。」她又指自己是冷靜司機，駕車至今約4年，從未試過響按。