闔家遊旺角 張繼聰嗌幸福

歌手謝安琪與老公張繼聰不時在社交平台分享一家四口的生活點滴，日前阿聰以「Perfect Sunday」為題，分享與妻兒到旺角出巡的相片，寫道：「最近冇機會旅行，今日去勝利道、花園街買小狗用品，再落波鞋街同哥哥妹妹shopping，喺旺角食埋晚餐，雖然我係鐵漢中佬，不過都覺得好幸福好開心，其實去邊度唔重要，最重要係一家人一齊。」他更特別標註：「多謝一位網友，拍低我哋一家人行街嘅背影，我覺得……其實我都幾有型。」有網民留言：「做明星仲可以周圍去都真係好開心。」阿聰回覆：「收咗工，普通市民。」