關係半生不熟夠新鮮 周柏豪拍床戲出晒汗 王敏奕：是地獄！

王敏奕、周柏豪、連詩雅（Shiga）及羅天宇等昨日出席明年1月1日播出的新劇《旁觀者》記者會，柏豪最難忘和王敏奕拍攝一場水底戲，不但耳鼻喉入晒水，加上自己患有幽閉恐懼症，所以拍攝時十分驚慌，上水後亦不斷嘔吐，王敏奕則表示：「見到佢當時好辛苦，同埋嗰場戲好沉重，所以都有幫佢。」

柏豪和王敏奕有不少親熱戲，不過兩人之前曾合作過廣告，故拍攝時並不尷尬，柏豪表示：「我哋係介乎熟同唔熟之間，拍出嚟先有新鮮感，我同連詩雅拍唔係唔得，但每一日都要搵新鮮感囉！」

柏豪又大爆拍攝水底戲時氣溫只有10度左右，但拍床戲時天氣炎熱，兩人熱到大汗淋漓，他說：「因為個廠冇冷氣，拍出嚟雖然好淒美，但其實熱到不得了，所以唔得閒享受，一啲都唔浪漫。」王敏奕則形容場地是「地獄」，她說：「拍嘅時候感受唔到嗰種味道，我哋身上只係得汗味。」而劇集首播當天是王敏奕的生日，她透露會跟家人一起看首播，生日願望是該劇有好收視。

至於飾演社工的Shiga，表示角色是她入行以來最大挑戰，除了多情緒戲，還要攀山涉水及遭受周志康強暴，她說：「我同周志康拍之前溝通好，度晒位先去拍，反而佢仲驚過我，因為有啲打鬥鏡頭，佢驚整親我。」