「是但一個攞都OK」 視后戰有阻滯？ 佘詩曼預告隨時No Show

【溫國佳澳門直擊】佘詩曼（阿佘）、高海寧（高Ling）、何依婷、王敏奕、馬國明及陳山聰等，前晚現身《新聞女王結局夜—女王終極直播》，雖然氣溫跌至10度以下，一眾女演員仍衣衫單薄，愛靚唔愛命，尤其是高Ling以「泰山裝」露出香肩食風。結局播映時，台前幕後包括阿佘與高Ling都感動到眼濕濕，劇集總監製鍾澍佳被問會否開續集，他表示要問無綫總經理，曾志偉隨即上台說：「睇到頭先個個都喺度抹眼淚，我都抹呀！因為下個禮拜冇咗呢個劇集，收視唔知點算！」

阿佘坦言大感不捨：「咁快就26集，都好嘅，等大家覺得唔夠喉，睇吓會唔會有Season 2。（好期待開第2季？）我都係睇劇本，但都好開心，好樂意同班底再合作。」憑該劇提名視后的她，談到出席頒獎禮時竟說：「嗰日有工作，依家盡量調動緊，盡量希望出席到啦！（準備同李施嬅拗手瓜？）是但一個攞都OK。」對於其他入圍女藝人紛紛「投降」，她謙稱：「我相信每套劇嘅演員都付出好大努力，大家都有機會。」談及黃宗澤（Bosco）化身彩蛋現身結局，她說：「監製問我同邊個小生未合作過，我就話Bosco。（感覺如何？）佢都係咁型囉！」

至於高Ling與王敏奕一同受訪，王敏奕打趣表示其角色是終極大贏家：「贏經驗呀！冇穿冇爛！（想拍續集？）梗係想啦！我個角色一定有好大發揮。」又自嘲似嘍囉，與直播室內的角色沒有太多對手戲。談及她與高Ling、何依婷入圍「最佳女配角」10強，她揚言支持高Ling，自己則是「陪跑」，高Ling說：「最開心係因為套劇而多咗好多工作，多咗人認識、討論同認同。」又指獎項難以估計：「有就梗係好啦！冇都會戥大家開心。」

另外，阿佘昨午偕英皇集團主席楊受成的女兒楊玳詩，與一班癌病學童舉行派對，提早慶祝聖誕，有小朋友問她：「你係咪『新聞女王』？我要搵你簽名！」逗得她開心不已。她透露聖誕未有狂接Job搵真銀，選擇行善及陪伴家人：「24號空咗出嚟畀媽咪。」記者笑問可想趁佳節脫單？她笑說：「我唔單㗎！身邊好多朋友。（追求者好難約你？）唔知佢哋喎！叫佢哋試吓啦！（嚟緊《家族榮耀之繼承者》推出，《新》劇咁好成績，係咪好大壓力？）唔會，因為唔係一個人嘅事，收視好與否有好多因素。」