獨家訪問：輕鬆辦婚禮 幫埋好姊妹 蔡嘉欣拜金無罪 男友話係餅乾碎

現年29歲的蔡嘉欣下月3日便嫁圈外男友陳栢賢，婚前暢遊約旦和意大利阿瑪菲海岸，玩足半個月，至昨日才有空到設計師好友Kev Yiu荃灣店試婚紗。她透露婚禮籌備得八八九九，月底會相約姊妹團的何依婷、陳詩欣和鍾晴食飯傾細節，辦婚事態度輕鬆，笑言有潛質做wedding planner，正好替突然宣布即將嫁人的何依婷辦喜事？她笑稱：「可以㗎！（何依婷宣婚好突然？）我就一早知，佢個人係低調啲，少講感情事，同我哋就有分享快樂事。」嘉欣表示身邊好友個個都偏向早婚，她亦支持早婚，感覺人生有個伴侶更穩定，現只欠鍾晴仍未有着落。

而她與男友今年相戀第7年，覺得對的時候便做對的事。雖然「拜金女」形象深入民心，男友全不介意：「係咪我識個冇錢就唔係拜金女？男友係多金過我，感情唔應該用有錢冇錢衡量，性格最緊要，我係鍾意賺錢，男友唔覺得我拜金，不知幾支持，話我拜嗰啲只係餅乾碎。」

嘉欣與無綫仍有約在身，她早於一年前已自行停工：「又唔算係辭職，想多啲時間打理網上頻道和生意，就同公司講我無意拚搏，唔使畀嘢我做。」離開前最後是主持《流行都市》節目，她否認與主持婦女節目有關，直言公司待她不薄，還給予拍劇機會，她稱：「公司好多美女，好多人好積極，我唔鍾意同人爭，冇特別想紅，鍾意自由自在做分內事，冇鬥心。（見過啲女仔好有鬥心？）見到都覺得辛苦，成日出現、講好多嘢去表現自己。」