致敬陳百強 集體入錯Key 炎明熹考試要緊 個唱補場延至明年

Gigi、鄭俊弘（Fred）、林奕匡及涂毓麟等昨日到港台出席《至愛陳百強30年紀念特輯》錄影，同場還有陳百強兄長陳百靈及表妹玲玲。打頭陣的Gigi獻唱《念親恩》及與其他歌手大合唱《一生何求》，她表示對陳百強的歌曲《漣漪》印象最深，她說：「一聽到首歌嘅音樂就已經想喊。」問到唱《一》曲時多位歌手入錯key，Gigi說：「可能首歌改編過，同埋大家未有時間綵排。」同場的林奕匡亦因耳機冇電，加上《一》改編過而未習慣：「所以有啲甩漏。」

另外，問到演唱會補場的最新消息，Gigi透露12月迎來入大學後首個考試，屆時要專心應考，故演唱會最快要待明年才安排補場，她說：「第一次考試好緊張，希望有多啲時間溫書，所以最快要下年先可以補場。（順便開多幾場？）我會加油，都希望可以開多啲畀大家睇，但要自己有能力嘅時候做，唔想嘥大家時間。」她續指明年會舉行巡迴演出，並希望返家鄉汕尾開騷：「希望有機會，咁屋企人就唔使長途跋涉坐車過嚟，我記得嫲嫲上次都有嚟。」

Fred透露最愛陳百強的《深愛着你》和《等》，問到可有用這些歌追女仔？他笑說：「咁又冇，依家唱畀個仔聽，今日唱《有了你》，歌詞『見少一秒都空虛』就係唱畀囝囝聽。（唔怕老婆呷醋？）唔會，相信佢同我一樣。」Fred太太何雁詩近日重新投入工作，照顧兒子的重任交由婆婆負責，Fred表示：「有長輩幫手睇住我哋仲放心。（怕長輩縱壞囝囝？）係無可避免。（佢最怕你？）佢唔怕人，未有呢個情緒，但尋日佢嬲咗我，我太夜返冇同佢沖涼同陪佢瞓，第二朝佢唔望我，玩咗好耐先笑番。」