被「命令」講國語 陳奕迅：聽唔明咪算！

「歌神」陳奕迅前晚舉行巡唱期間，被觀眾「命令」講國語，令他成為熱搜人物！事緣觀眾反應熱烈，多次被打斷說話的他苦笑說：「每隻歌都係一個連貫性舞台劇咁，我唔會畀你哋影響到我，我要好集中去用歌講古仔。」但觀眾依然喪叫，他無奈表示並非「傾偈會」：「我同你講緊嘢，其他聲又嚟，我聽唔到，我會好煩……」此時有觀眾以命令口脗大叫：「講國語！」有人接力嗌：「講普通話！」他搞鬼地以泰文打招呼作回應，然後說：「我想講甚麼語文就講甚麼！你可以要求，你可以『唔該』、『請』、『麻煩你』 ！大家唔好誤會，就算有人咁樣叫我講英文，我都會叫佢Shut up！你聽唔明咪算囉！」全場觀眾拍手歡呼。事後大批網民留言支持他，勸他毋須為無禮觀眾不開心。