蕭正楠陳豪水戰11粒鐘

無綫劇集《破毒強人》收視理想，前晚一集張曦雯被炸死相當催淚，她的精湛演技，令觀眾感受到角色的絕望與驚恐，紛紛大讚：「原來Madam梨花帶雨個樣好靚」、「眼濕濕呢部分做得好唔錯」。昨晚大結局，最矚目肯定是陳豪與蕭正楠的終極生死戰，一場3分半鐘的雨中大戰，2人均出盡力打到嘭嘭聲，更凌空被拋落地！蕭正楠受訪時透露，該場戲由晚上7點打到朝早6點，由於被水淋足全晚，凌晨後開始見凍：「同事知我哋凍，走去買咗杯好暖嘅奶茶，好溫暖！」