江欣燕婚前小產 情緒崩潰

藝人江欣燕在電台《星光背後》訪問中，詳述入行後的兩段情，她和初戀情人張衞健拍拖5年，一直備受父親反對，認為對方會教壞她，最終兩人是和平分手。而她跟前夫吳積遜的婚姻，她首次披露當年本是奉子成婚，但結婚前夕卻經歷小產打擊：「一次企高拎嘢感到雙腳乏力，搵醫生檢查後，先發現胎兒冇咗生命迹象，但係我接受唔到，好失望，仲諗過仲結唔結婚，當其時表面開心嘅我，其實情緒崩潰咗好一陣子。」