何廣沛手語傳心 演到抽筋

何廣沛、郭柏妍及張寶兒在劇中關係微妙，有親情、愛情及友情。飾演啞巴外賣員的廣沛首度挑戰手語，為了盡快投入角色，他專誠找來聾啞人士指導，並報考初級手語試：「上堂時透過手語同肢體語言交流，真係一個鐘全程做手語，唔講嘢㗎！拍攝時覺得難度好高，本身出名背劇本叻，但做手語完全係兩個世界，所有對白透過手語表達，有時做做吓會手抽筋同打結。」