任達華爬雪山陷困境求救

影帝任達華昨日為相機器材產品新店開張擔任嘉賓，吸引大批人圍觀。他不忘攬舞師「攞彩頭」，又透露花了約兩天時間，將照片與畫作結合，製成兩幅作品，作為新店開張賀禮。久違了的他指自己由嚴寒「回歸」炎熱天氣：「之前喺內地拍電影《虎視眈眈》，日日喺海拔2000米做體能運動。（你一度失聯？）入咗森林收唔到電話。（同東北虎做對手戲？驚唔驚？）驚！佢哋發出嘅聲響好沉，太危險嘞，所以有好多後期CG加工，不過我哋都盡可能親身上陣，日日爬雪山，成日跌入啲厚雪中起唔番身，全身濕晒，要搵人嚟救，每次起碼要等半小時，我對手都生咗凍瘡。」