煮飯餵飽陳家樂 連詩雅「自肥」

藝人連詩雅昨日出席慈善活動，席間對陶瓷製品愛不釋手，又直言希望與老公陳家樂齊齊試玩：「每年自己生日，都想同佢做啲DIY，睇吓今年會唔會有機會整吓陶瓷。」她冧爆指曾收過家樂自製的心意卡。記者打趣問她想收卡還是鑽石多點，她即說：「收卡已經好開心。唔知係咪年紀大咗，愈嚟愈喜歡家品嘢，粉絲都好鍾意送煲煲罉罉畀我，亦多咗喺屋企煮飯，因為覺得健康啲。（最叻煮乜？）試過過節整花膠炆冬菇。」問到家樂是否食「住家飯」增磅？她笑說：「佢食極都唔肥，我就因為煮飯試味肥咗。（整愛心飯盒畀老公？）早排佢拍劇，都有煲湯畀佢，佢都有請身邊嘅人飲。」