姚焯菲大膽創新 全因一個男人

「聲夢小花」姚焯菲（Chantel）雖已飛返新西蘭繼續升學，不過其新歌《小出走》仍在熱播中。早前她接受網上節目主持艾力訪問，她表示以全新曲風演繹新歌，作出大膽嘗試全因一個男人，就是其音樂監製T-Ma：「因為過去啲歌嘅曲風比較優雅同正經，但今次呢首歌就比較無憂無慮，T-Ma知道我嘅風格，同埋我擅長啲乜嘢，佢就畀咗呢個曲風我，我又唱得好舒服，覺得呢個係突破囉，係一種比較無憂無慮同懶洋洋嘅唱腔。」