馮盈盈最憎另一半吸煙

藝人馮盈盈與孔德賢昨日出席戒煙活動，她受訪時直言對吸煙異性相當抗拒：「除咗煙民，我都好難一下子諗到最憎追求者啲乜，食煙真係會口臭，同埋引發好多疾病，都想另一半長命啲。（依家有冇人追？）我要讀書，又要兼顧工作，暫時冇時間，想專心一意應付學業，起碼年底畢到業。」她隨即自爆上學期考獲A級成績，且獲得教授賞識，鼓勵她向「食物管理」專業繼續鑽研及發揮，問到會否再升讀博士，她坦言：「我本身好有興趣，但要睇有冇教授肯收我。依家讀碩士，公司（無綫）已經好遷就，如果真係要繼續再讀上去，真係要同公司商量吓先。」