林敏驄開騷 鍾鎮濤跪低 郭柏妍唱Live搣唔甩「魔音」

為不少金曲填詞的林敏驄前晚在西九舉行作品展演唱會，並邀得太極、曾比特、露雲娜、雷安娜及鍾鎮濤等擔任嘉賓，而和他合演《下》劇的江美儀、郭柏妍及羅毓儀等也捧場支持。向來以口臭見稱的林敏驄繼續把口唔收，林敏驄見到曾比特，他戴上爆炸頭假髮自封「邱比特」，自言找不到關淑怡的他，介紹湯寶如出場時說：「想搵寶麗金3小花，黎瑞恩係生意人，心廣體胖出唔到?，劉小慧又要睇住蘇志威，真係睇少眼都唔得！」至於壓軸登場、已70歲的鍾鎮濤（阿B）被林敏驄寸：「你奔7喎。」阿B答：「我係正7，啱啱70歲，都保養得幾好，做Gym都仲舉得起。」其後又被對方玩食字笑他不舉。期間阿B不慎跌倒，林敏驄笑說：「我企喺呢度，你做乜去嗰邊跪？」

期間林敏驄跟江美儀、郭柏妍及羅毓儀等合唱《一家人》，有「魔音芊芊」之稱的郭柏妍更挑戰唱《跳舞街》，但唱功依然「保持水準」，被文凱婷及鍾柔美負責的跳唱版比下去。

騷後林敏驄受訪時被問到40年有何得着，他說：「好幸運，寫咗咁多好歌，求其攞一隻出嚟都影響深遠，係我最大嘅成就及驕傲。寫第2隻歌《忘不了你》都已經覺得夠，點知仲有咁多百首喺後面。（版稅食到依家？）哈哈！嗰啲好少嘢啫。（郭柏妍唱成點？）佢自生自滅啦。（訓練佢做歌手？）呢啲嘢冇得勉強。」至於在台上跌倒的阿B則說：「我隻腳傷咗，仲帶住護膝，只係拗親啫，唔係好嚴重。」