倫敦開騷變推銷中醫 張敬軒頭髮變疏 想拍拖

張敬軒首次在英國逾百年歷史的殿堂級場地Royal Albert Hall舉行一連三場《the PRIME CLASSICS HINS LIVE in LONDON》演唱會，日前舉行頭場，除有500多位來自香港的「鐵粉」捧場外，還有內地、英、美、法及丹麥等地粉絲。騷後，軒仔坐的座駕被過千人包圍拍照，場面墟冚。

軒仔於騷上表示珍惜與英國觀眾見面機會，又自爆在社交網開設私人帳號，欲了解港人移居英國後的生活，有觀眾大叫：「掛住你呀！」他即謂：「所以咪飛過嚟！」續指見有初移居者不習慣：「好似小朋友病咗，唔想食西藥，又冇得睇中醫。我同中醫朋友講，倫敦有得做喎！」令不少人既感動又笑不停。

他表示今次特意提前10天抵英適應，但事與願違：「每晚凌晨2、3點就醒，倫敦冬天又乾又冷，喺街上總係覺得好凍，覺得如果身邊有個可以拍拖嘅人就好啦！」他又感慨表示：「我42歲，隨着年齡增長，可能頭髮冇以前咁多，聲音冇以前咁響亮，但呢3晚會全力去演唱。」由於去年開騷時不幸染病，故今次即使歌迷送花及禮物都由工作人員代收，他望大家體諒，以保障稍後陪父母的難得假期。而開騷前，他與身在當地的藝人蔡卓妍High tea小聚。