補擺喜宴 群星到賀 吳業坤啜爆老婆 外父催生B

剛榮升「TVB Music Group一哥」的吳業坤自去年5月自爆「小弟結婚了」後，相隔10個月於昨日假尖沙咀補擺喜宴，雖然他聲稱是「小型西式派對」，但一對新人仍穿上中式禮服向長輩敬茶，而新娘濱口愛子嫁得夠體面，除雙手戴上五對超厚的龍鳳鈪外，還有大金鏈及多對金戒指，坤坤心口的金豬牌亦相當有分量。

到下午舉行西式派對時，濱口愛子換上拖尾逾15呎長的婚紗再襯鑽石手鏈，由她的爸爸拖住入場，親手交愛女給坤坤後，一對新人在逾百來賓面前，包括坤坤的圈中好友陳山聰、譚俊彥、陳敏之、胡鴻鈞、鄭俊弘、謝東閔及「緋聞女友」薛家燕的歡呼下，互擁來個深深一吻，再進行切結婚蛋糕儀式，期間濱口愛子的爸爸就催女婿早日生B。現場設Live Band，歌手們輪流上台獻唱，其中唱不停的坤坤特別向太太送上定情歌，情深演繹日本歌手秦基博的《愛》，浪漫滿瀉，鄭俊弘則唱《你的名字 我的姓氏》作賀禮。

一對新人接受傳媒的祝福，但以怕醜為由婉拒咀嘴，坤坤只肯錫太太面3次及騷婚戒，問到擺喜宴心情，坤坤表示緊張：「因為我哋註咗冊，流程好簡單，不過媽咪飲茶時，同太太一齊感動到喊，我都眼濕濕，外父、外母都好感動。」提到席上大唱日文歌，他則說歌曲意義重大，原來是初相識時曾聽過，加上主唱的歌手是太太偶像：「我一直記喺心，直到結婚時，當驚喜送畀老婆。（練咗幾耐？）幾年。」至於被催生BB，他指大妗姐也祝他連生貴子生夠10個，雖然雙方家長心急抱孫，但他們計劃3年後才造人：「依家搏殺時期，就快要入組拍劇，要結婚只係請咗幾日假，之後就準備拍劇又要錄歌。（你講過婚後睇多咗『愛情動作片』喎？）都冇時間，連劇本都冇時間睇，工作為先。」

而陳山聰笑言以「老爺」身份飲喜酒：「因為我同佢拍過劇集《飛虎之雷霆極戰》，佢係做我個仔嘅。」而因合作《男神廚房》和新郎結緣的譚俊彥則謂：「懷疑佢偷睇我嘅秘笈，用嚟煮嘢食氹老婆。」陳敏之就大讚一對新人好甜蜜。