食「加料」早餐預咗肚屙張敬軒獨家獻唱李元元派檸檬

張敬軒主動為星二代李元元（Lucy）作獨家獻唱，怎料遭對方「派檸檬」拒聽！他又被Lucy整蠱，用一雙小手仔為他炮製「亂咁撈」的早餐，冒肚屙危險照食落肚。

張敬軒主理的自家網上節目《軒公敲碗》，最新一集找來深受網民喜愛的李璨琛女兒Lucy做嘉賓，影片上架不足一日，迅即登上熱門影片第一位。軒仔的大宅成為「託兒所」，為Lucy度身設計一日託兒服務。為了盡快跟小朋友混熟，他預備了玩具化妝套裝為Lucy扮靚，當他看到Lucy塗上又藍又綠的眼影，忍不住笑言：「我擔心你阿媽以為我虐待你。」又準備了多套公主裙任她挑選，並大讚她有手尾：「佢自己會執番整齊啲嘢，呢啲小朋友真係好少見。」

首次與家人外遊

Lucy於整早餐環節中，興奮地將橡皮糖、薯片、粟米、蛋混在一起「加料」，在旁的軒仔搖頭笑言：「我同早餐都係冇乜緣分，食完肚屙都似！」他問Lucy：「你知唔知我陣間要食咗佢？」Lucy點頭說：「特登！」軒仔爆笑邀請她一起吃，Lucy反應超快拒絕：「唔使！」非常搞笑。之後軒仔表示要唱歌，Lucy竟說：「唔使啦。」當眾請軒仔「食檸檬」，難怪不少網民留言：「應該冇人咁樣派檸檬畀軒公，好好笑。」

此外，軒仔身在英國，為即將舉行的演唱會作準備。此行他偕父母隨行，自爆42年來首次一家人外遊，並分享兩父子幽默對答，他指被「老爺」的電動輪椅輾過其腳，父親卻問他發生甚麼事，他說：「我話你轆親我，佢話佢feel唔到，我話唔緊要，我都feel唔到自己仲有隻腳。」