拍MV跟男主角零接觸炎明熹循序漸進唔急開紅館騷

「聲夢人氣王」炎明熹前晚現身節目，透露新歌MV中跟男主角沒有接觸，待大個女後再跟男主角做對手戲。擁大批粉絲的她有意待完成DSE後開個唱，但未敢一步登天開紅館騷！

炎明熹前晚為籌款節目《博愛歡樂傳萬家》獻唱，包括仍未推出的全新單曲《大開眼界》。她透露歌曲MV稍後曝光：「個MV會有懸崖同海，我會以旁觀者身份講述故事。（有冇男主角？）有男主角同女主角，不過我同佢哋都冇對手戲。（想唔想有對手戲？）想，我諗將來會有，因為長大了。（有邊個係你心儀男主角？）呢個世界太多人，我揀唔落手。（姑丈呢？）我問姑丈佢又扁嘴。」

問到可有計劃開個唱？她坦言想，但要跟公司商量，一切待考完DSE後。再問是否首選在紅館開騷？她說：「我非常之想，但覺得要儲多啲經驗先可以踏上呢個舞台，想喺其他地方表演先，唔使一嚟就紅館。」

李幸倪預告出慢歌

而李幸倪（Gin Lee）擔任壓軸嘉賓，穿露背裝首度現場獻唱新歌《Dum Dum》。她坦言做跳唱歌手不易：「下一首先唱番慢歌，隔一隔再跳唱。」又透露計劃今年底或明年初開騷，故有意多推出幾首跳唱歌，以及上跳舞課堂為個唱作準備。問到會否請教師姐容祖兒？她說：「會，希望將來有機會同佢合作。」

穿低V裙的王灝兒（JW）與吳業坤為拍劇，分別將頭髮剪短及電鬈。兩人多年前曾推出合唱歌，吳業坤表示想再合作，JW則笑言之前與對方不同公司，現時難得同公司，吳業坤即問女方：「你唔會咁快走吖嘛？」JW笑言：「我唔會，都係睇你。」