難得有型 晚晚追劇 馬國明湯洛雯老公老婆相稱

馬國明、陳山聰、劉佩玥（Moon）、劉穎鏇（Tiffany）及林子善等，昨日出席主演劇集《隱形戰隊》宣傳活動。監製文偉鴻特意剪輯預告片與在場粉絲分享，又再次打趣指馬國明是被天然呆耽誤的型男。馬國明自爆接獲舊同學電話，相信與追問兩位女拍檔「雙劉」的事情不無關係。玩「爆波遊戲」時，Moon重演騎上馬國明身上的一幕，而林子善講述拍攝事宜，突然感性流下男兒淚。

受訪時，馬國明談到今次「史無前例」化身型男，他老實不客氣：「我都覺得自己幾型。（日後拍多啲動作片？）真係唔介意，做咗咁多年呢行，都想搵啲變化，帶多啲新鮮感畀觀眾。」談到靚湯早前到日本旅行，他表示：「佢有朋友結婚，成班女仔一齊去旅行，已經返咗嚟喇，晚晚喺屋企陪我睇劇。佢都讚我有型，平時我喺屋企比較隨意，難得見到個老公咁有型。（已經叫老公？）有時喺屋企我都叫佢做老婆。」

問到婚期，馬國明坦言：「真係要問佢，我聽日就開《NEWS新聞女王》喇，坦白講，我梗係想同佢組織家庭，但我拍過咁多結婚戲，對婚禮已經冇咁多憧憬，淨係想交出一個佢滿意同喜歡嘅婚禮。（點都拍完新劇先結婚？起碼半年後喎！）呢個一定係！」

Tiffany與Moon今次是「性感擔當」，成功引起網民熱話。她們在活動上互笠高帽，Moon打趣說：「你尋晚比堅尼出水芙蓉Look引起暴動。」Tiffany回道：「你前幾日先暴動完喎！」日前劇情交代Moon跳上容天佑「重要部位」一幕，Moon笑說：「拍攝時好緊張，因為天佑完全冇做保護工夫，我稍有不慎就會出大意外，而我又唔係身手特別靈活嘅人，好彩最終有驚無險咋！」她又讚Tiffany為操肌付出不少，可能只是幾秒鐘的鏡頭，已花了半年時間操練：「佢食白烚雞胸，食到最尾唔能夠再食，都將雞胸肉打成糊狀照飲！」Tiffany承認：「咁大個女真係冇做過咁多Gym。睇番嗰場戲又唔覺得尷尬，反而將焦點放咗喺肌肉線條上。（被讚『最強body2.0』喎？）的確係比《超能使者》時更弗。」