古董車連環壞係時候檢討謝安琪禁張繼聰送車自肥

歌手謝安琪與老公張繼聰向來恩愛，對於老公12小時內兩度壞車，要花費求助拖車師傅，她昨日現身活動時揚言沒有嬲怒，還大讚老公以有趣方法交代事件，全因心理質素強大，即使面對強大壓力也能笑住瞓，不過即將生日的她，就極度抗拒再收車作為禮物，笑指此乃老公買車的借口。

謝安琪（Kay）昨日出席公開活動，對於老公張繼聰日前於社交網拍短片自爆於12小時內連環壞車，結果兩度Call拖車協助，Kay聞言也大表無奈，表示阿聰作為古董車發燒友，故經常遇上壞車，惟如此短時間內要兩度求助於拖車師傅，就認真是首次，也對他其中一架車斷鎖匙感費解：「到依家都係一個謎，我都有揸嗰架車，但從來冇遇過，佢就話因為自己大力，我都有講笑話不如買架拖車，咁可以幫佢拖去相熟車房，因為拖車都好貴，所以佢冇講搞咗幾錢。」

「隻眼開眼隻閉」

提到阿聰以有趣方式來演繹慘況，Kay大讚老公心理質素強大，即使遇上大壓力，睡覺仍能笑出聲：「知道條片帶畀好多人歡樂，滿滿正能量，唔係嘅話我都鬧咗佢啦。（你都好好脾氣！）我隻眼開眼隻閉，因為佢除咗運動同湊小朋友之外都冇乜其他嗜好，但都係時候要佢自己數吓有幾多車，我見都起碼6、7架，今次壞嘅分別係40幾年嘅私家車同70幾年嘅電單車。」

以往阿聰曾送電單車給Kay作為生日禮物，問到生日將至的她想收到甚麼禮物？Kay表示：「唔好再送車畀我，因為佢已經唔止一次，次次都話係買畀我，但其實我係最少揸車嘅一個。（到時點慶祝？）都係同父母喺屋企食飯，有咗兩個小朋友之後都唔會有二人世界，所以都唔會出埠。」