高海寧想向阿佘自薦

對於即將夥拍佘詩曼演出劇集《NEWS新聞女王》，身為後輩的高海寧及何依婷都開始做準備工夫，以免屆時表現失禮街坊。高海寧表示：「近日我除咗睇劇本外，真係睇咗好多新聞報道，想學習主播嘅眼神、動作及語氣等，希望自己變得專業啲。（阿佘有計劃開自家製劇集喎。）咁都想佢覺得有適合嘅會諗起我，或者我都要自薦一吓。」

何依婷則說：「我最近都係讀吓新聞、睇吓劇本咁。知道前輩咁努力，自己都不敢怠慢。（會唔會想好似阿佘咁涉足製作？）現階段資歷不足，先顧好幕前工作先，如果有機會嘗試幕後我都唔抗拒嘅。」而李施嬅早前於馬爾代夫旅行叉足電，她繼續於社交網晒旅行相，勁騷白滑玉背，身形弗爆。施嬅表示今次角色曾到英國留學，故會有連串英語對白：「要搵啱口音，同埋我覺得新聞主播要口齒伶俐，要練好咬字，嚟緊我哋都會同啲真正嘅主播見面交流，了解佢哋日常嘅工作。同埋今次我哋嘅故事唔係集中喺香港，範圍大咗，所以都要上網做多啲資料搜集，同埋參考多啲紀錄片先得。」