天氣涼少人Keep Fit？ 鄺潔楹合資7位數 健身室蝕入肉

她表示慶幸曲奇及服裝生意沒有實體店，減低損失，相反健身室損失慘重，Judy表示：「呢排大家着長袖衫多，啲客覺得唔使急住Keep Fit，真係好慘。（個個月要擺錢落去？）本身合資7位數字，我拎咗6位數出嚟，所以心入面有個數喺度，再過底線就唔得，依家急謀轉策略，守業好難，惟有咬緊牙關。」談到與富二代男友Ricky拍拖兩年多，近日卻未見再提及兼放閃，惹來分手疑雲，她聞言大派定心丸：「我哋OK，只係平時少提啫！（咁有計劃結婚？）未有，我仲有好多嘢想做，見銀行（存款）數字愈來愈少，好想生意上有作為，我肯定要有小朋友先結婚，對方都冇詐型，總之結婚一定會講，雖然都30歲，但哥哥都未結婚，我就要保持好身材同樣貌，唔想畀人覺得老！」

另外，無綫公布上周節目收視，Judy有份演出的《新》劇最高收視21.4點，而處境劇《愛．回家之開心速遞》最高收視21.5點。至於前晚播出的《中年好聲音》競爭進入白熱化，參賽者配對合唱引發關注外，跨平台直播收視最高達24.1點（約155萬觀眾），錄得開播以來最高收視，亦榮登上周翡翠台黃金時段收視榜首位置。新一集將由譚詠麟任評審，屆時參賽者會唱出其金曲作賽，定必引發另一高潮。