「佢係我First Priority」 千嬅湊仔搵學校 真情打動考官

楊千嬅早前為J2台節目《鋪鋪Poker》擔任嘉賓，其招牌笑聲充斥Poker枱，向來口齒伶俐的她，更將賭局變成清談節目。講到老公丁子高在圈中素有「遊戲大王」之稱，主持陳欣茵問到會否與老公同枱玩Poker？千嬅斬釘截鐵表示︰「係就真係大鑊，會變成『倫理』問題，真係大件事嗰啲！佢一係話『做咩呀，你仲去』或者『你唔係呀，你大我呀？』」絕對是個兩難局面，身旁的劉浩龍似乎感同身受，表示︰「我完全諗到個畫面。」

千嬅又講到幫兒子報學校的事，指面試當日遇上外籍面試考官，她笑說︰「我見到佢喺我面前上網搵我資料，因為佢副眼鏡反光睇到，跟住佢即刻針對我問『你可以畀到幾多時間陪小朋友學習？』我答係可以隨時隨地，因為囝囝係我First Priority（首選）。」最後兒子成功入讀該校。

水瓶座的千嬅自言愛用星座來相人︰「可以大概知一個人性格，當然人人會有唔同。我個仔雙子座，會有自己邏輯，唔會講阿媽唔啱聽或者有機會畀媽咪問番轉頭嘅嘢。依家小朋友個個都係咁，佢算低壇數。」她又爆兒子最叻在她和老公面前扮細路，她笑說︰「點樣識穿？因為見到佢同其他小朋友玩嘅時候，啲樣唔係平時嗰啲樣。當你發現小朋友喺爸爸媽媽面前質低自己扮細路，就知道佢已經唔係細路。」同時又表示發現兒子另一秘密，就是愛聽她的舊歌︰「聽到佢喺房聽我首舊歌《河童》，佢話學中文喎！唔知點解佢識聽。」