赴澳洲做華姐評判 陳展鵬奉獻酬勞 請假冧老婆

視帝陳展鵬日前去澳洲為今屆華裔小姐擔任評判及表演嘉賓，他大讚今屆佳麗質素極高，自己更Tip中3甲。已有7、8年沒有去當地的他，今次特意請假陪太太單文柔（Phoebe）在當地共度浪漫的情人節，他受訪時表示：「好多年冇去澳洲，今次公司安排得好好，之前每次都來去匆匆。我請咗幾日假同Phoebe喺度玩，忙裏偷閒，呢度天氣非常好。之前結咗婚都未有時間度蜜月，呢幾年大家都辛苦，又要做嘢，又要照顧『小豬比』，今次當係畀住啲『利息』先！啲利息都好貴㗎，已經將今次嘅酬勞擺晒喺個Trip度。」

展鵬在當地有不少朋友，各人都很好客，帶了他們去食海鮮及四出遊覽，展鵬說：「朋友帶我哋去食海鮮，呢度啲中餐館水準比之前更加高。我哋出咗海同埋去酒莊參觀，因為Phoebe第一次嚟，我帶咗佢去抱樹熊同袋鼠BB。」Phoebe受訪時表示之後會盡情享受陽光與海灘：「我一直都好想嚟澳洲，知道呢度有好多好靚嘅沙灘，所以之前都Plan咗會去。今次呢個Trip係橫跨咗情人節，所以情人節我哋會喺澳洲過，雖然展鵬成日話未度蜜月，但好似今次咁已經好開心。」