龔嘉欣Lisa上身扭腰放電引陳豪

無綫花旦龔嘉欣於新劇大玩百變造型，近日更以韓國女團BLACK PINK人氣成員Lisa造型登場，扭腰放電向陳豪拋媚眼，養眼指數爆燈！

龔嘉欣在無綫劇集《新四十二章》繼以留鬚造型斬豬肉後，近日劇情講述她為求目的施展渾身解數，更出絕招以BLACK PINK成員Lisa造型大跳K-Pop冧陳豪！換上一頭淡紫色長直髮的她，配以Cap帽及超緊身露腰上衣，在半分鐘Solo中狂扭纖腰兼撥頭髮拋媚眼，盡情放電，睇到網民大嗌過癮！

曾學習多種舞蹈的嘉欣，受訪時表示拍跳舞戲份難過打戲：「平時好少接觸呢類舞，所以拍之前要練習，但要跳得好睇同忍笑都好難，因為陳豪實在太搞笑，佢嘅反應真係好有喜感。」

鄺潔楹「爆」到呆

曾預告有「驚喜」的鄺潔楹亦登場，單是超級巨型爆炸頭已相當吸睛，她笑指一身打扮包括面上的雀斑，全是監製陳維冠的主意：「去到化妝間，知道個爆炸頭係我嘅真係呆咗，第一次試呢個髮型搞咗個半鐘，好擔心係咪每次都咁耐。」更笑言爆炸頭令她非常論盡：「試過勾到道具，吊威吔又勾到條線，同埋角色需要大量配飾，每次造型差不多要兩個半小時。」客串的羅毓儀亦激罕以壞女孩造型現身，惡形惡相向江嘉敏咆哮，獲網民大讚有新鮮感。