拍打戲習慣受傷 龔嘉欣是非不絕 被誤解嘆無奈

龔嘉欣（Katy）於熱播劇《新四十二章》飾演擁有神力的豬肉檔老闆朱螢嬌，由於其角色於另一維度跟清朝的鰲拜連結，她需要長期黐假鬚兼有大量打戲，不過她沒有怨言，表示與監製陳維冠多次合作，互相信任，樂於嘗試任何挑戰。

提到每次演出的角色都難度甚高，她說：「今次玩到黐鬚都好犀利，初時都擔心，但經過後期製作幫助，整體觀眾都覺得個角色可愛、正能量，唔係肉酸。」劇中她不乏打戲，由於她體重太輕，試過吊威吔時，爆炸力令她凌空打後空翻，亦試過被威吔繩整傷手！她說：「大家都慣晒！因為如果我NG，人哋又要陪我做多次，所以想做好啲。之前拍《殺手》耍刀，今次就係拳腳同打空翻。」

去年Katy主演的劇集《十八年後的終極告白2.0》反應不俗，但於台慶頒獎禮「視后」竟10強不入，她曾於活動上哽咽表示「我係捱番嚟」，被指暗寸陳瀅，自此不時捱罵！問到會否覺得大受委屈？她說：「咁又冇喎！有是非就代表有人氣，我覺得唔緊要，從呢件事學習到啲嘢！（有冇唔開心？）有有有，一定有！當刻反應係點解會變成咁嘅？應該係愕然！會諗番其實我不嬲都唔會評論人哋，亦冇資格評論人哋，不過呢啲新聞過咗去咪算！」並強調公司對她很好：「公司有叫我續約，由舊年年尾一路傾緊。（幾時約滿？）未咁快，咁公司畀我嘅Offer都好好。」

除了演戲，3年前Katy已榮升業主，更投資餅店生意，她表示很感恩：「我哋呢行唔平穩，比較被動，亦唔知將來會發生咩事。我好鍾意儲錢，一儲錢就好開心，可能係細個爺爺同我講『少壯不努力，老大徒傷悲』。」