高海寧拍劇唔夠喉 踩過界攻網

高海寧、王君馨、吳業坤等前晚出席頒獎禮，身穿Tube Dress的高海寧笑言要好好向網上發展，努力經營自己的社交網，望能似陳凱琳一樣成功，她說：「有機會都要請教吓佢，佢團隊拍片剪片都好靚。」

講到3月將開拍無綫重頭劇《NEWS新聞女王》，她指已收到劇本，隨後要試造型和進行圍讀，因角色要留長頭髮，自然亦要準備Keep Fit，她說：「因為今次啲衫好貼身，同埋新年又食咗好多嘢，所以都要Keep Fit。」她又透露劇中飾演馬國明徒弟，人見人愛好似女神一樣，但為爭上位亦有自己的手段，相當有挑戰。另外，她雖然是上月中生日，但生日飯吃個不停，有朋友陪伴歎美食，更直言肥多幾磅也沒有問題，食完再減。

王君馨同樣以性感造型亮相，配合推出英文跳唱新歌《Light it up》，新歌MV亦於活動中曝光，歌曲以英文配搭西班牙文，她希望有機會與外地交流，MV後期更製作超過一年，她希望能有國際水準，衝出香港。自資出歌的她指除了這首英文歌，亦正籌備第一首廣東歌。

至於剛由日本返港的吳業坤原來在當地拍攝新歌MV，更找來太太擔任MV女主角，並大讚太太廣東話進步神速，問到他可會介紹太太加入無綫？他說：「唔會喇，佢都係想向網上KOL發展。」而是次日本行他除了拍MV，原來更與無綫高層樂易玲在朋友介紹下和日本男星佐藤健食飯見面，大家亦有洽談合作的可能，他笑說：「見到佢真人，原來有人可以靚仔到咁，如果佢有機會拍我哋公司嘅戲，希望我有機會唱主題曲。」