摸Pet Pet：懵狗愈鬧愈興奮蘇韻姿養破壞王訓練EQ

「熊心如」蘇韻姿（Andrea）在處境劇《愛．回家之開心速遞》的貴婦狗「啤啤」小巧可愛，現實中她卻鍾情外形粗獷的法國老虎狗。她指愛犬Otis雖然在狗界中屬低IQ，事實卻是面懵心精，多得狗狗經常激到她爆喊，才訓練出高EQ！

Otis只得2歲，但四肢發達，體重達26磅，而且樣子帶點兇狠，不過鐵漢柔情，牠每行一步都黐實主人，冧到Andrea心心眼：「佢係我嘅命根嚟，我就係鍾意啲另類狗狗。其實唐狗我都鍾意，不過就要有大地方先啱養，我暫時未有能力住到好大嘅地方。」

怨愛犬「失職」

談及與Otis相依為命，Andrea指開心比難過多，最難忘是愛犬性格太活潑，經常激到她紮紮跳：「有日我收工好攰咁返屋企，諗住快啲落妝瞓覺，點知一開門就見屋企部40、50吋電視機跌落嚟，我鬧佢：『部電視機我儲咗好耐先買到㗎，點解你講極唔明㗎？』我愈鬧，佢就愈興奮，以為同佢玩，嗰刻我嬲到崩潰，踎低咗喺度喊！」

事後她學會凡事要冷靜，再找出問題根源及解決方法，現時Otis已不再是「破壞王」，她摸着愛犬說：「我啲耐性係佢訓練返嚟嘅！」問到與Otis出門，是否沒有人敢埋身？她哈哈大笑：「係呀！我初時仲諗住靠佢識男仔，佢真係做唔到嘢，不過好多女仔鍾意呢種狗，可能佢夠Man啦！」