Edan巴黎時裝周晒琴技 Anson Lo孖Jeremy赴日開工 「嚴陣」以待

MIRROR踏入新的一年已磨拳擦掌，重新出發。成員Anson Lo和Jeremy向來老友，繼去年10月孖住到韓國及日本旅遊後，他們昨日再結伴同行，飛到日本東京工作。Anson Lo率先在保母車上打卡，車廂內有大量行李，直至早上8時15分，他與Jeremy在花姐及工作人員陪同下現身機場，現場有半百粉絲守候送機，場面墟冚。見Anson Lo着住黑色皮褸並戴上頸巾，Jeremy則以樽領冷衫加大褸上陣，「重裝備」迎接日本嚴寒。臨入閘前，有粉絲向Anson Lo送上禮物，他即禮貌接過，又企定定讓「神徒」拍照兼揮手道別，非常親民。

另一成員Edan早前去了法國出席巴黎時裝周，他昨日在社交網晒完騷後即興彈奏歌曲《E先生連環不幸事件》的短片，並發長文透露彈這首歌的原因。他表示今次巴黎之旅做了2件「好黐線嘅事」，第一是在時裝騷場地彈奏《E先生》，他表示當時現場有座三角琴，供樂手彈奏作為時裝騷的背景音樂，當日完騷後，突然聽到琴聲，原來有位名人走上台彈琴影相，同事就提議他上台彈琴，他就膽粗粗走上台，自嘲︰「唔知哪來的自信當住咁多人面前上咗去彈。上到去，超緊張，手指好似唔識郁咁，之後就係呢條片了。其實都真係太癲，What An Experience！好彩冇畀保安抬走啫，以後可以同個孫講『你阿爺試過喺巴黎時裝騷度自彈自唱《E先生》，講咁耐，其實都係想話畀大家知一個好深奧嘅人生大道理『驚Seven嘅話，唔好做第一個』，完！（Btw彈完之後有個外國人話要邀請我去睇佢6月嘅Fashion Show，唔通佢都覺得《E先生》好聽？）」

此外，前日初七「人日」，汪明荃和羅家英邀請Edan、Anson Lo和Jeremy到其西貢豪宅拜年。羅家英在社交網直播與MIRROR成員一齊Jam歌，羅家英與Edan中西合璧，一個拉二胡、一個拉小提琴，十分搞笑。不過汪明荃卻把Edan寫成「Edam」，即鬧出笑話。