發新年財開個靚頭 讚軒仔Pat Pat翹 祖兒入戲院賞月

容祖兒昨日出席沙田馬場舉行的《農曆新年賽馬日》，穿上桃紅色舞衣勁歌熱舞，吸引大批Fans支持！繼2008年後再度擔任賀歲賽事嘉賓，祖兒興奮表示舞衣本來沒有打底衫，為安全起見才加上Tube：「今日咁凍，不過要搵件紅噹噹同適合新年嘅衫真係好難。」又表示會落注碰運氣。

談到日前拉隊到老闆楊受成屋企團年，大玩魚蝦蟹，祖兒笑言人太多擠不入，要由前輩惠英紅撲到賭枱代為下注：「我買咗一鋪500蚊，結果開咗兩隻蟹，贏咗1,000蚊，好開心！（邊個係大贏家？）冇乜大贏家，阿Sa（蔡卓妍）做莊，但楊生出本，所以佢係為大家服務。（有冇見到新加入嘅Gin Lee？）有見到，不過現場好似花墟咁多人，大合照都要影4次先齊人。」忙巡唱的她難得返港度歲，透露今年有意在港開騷，問到兔年會否想桃花旺盛？她笑說：「隨緣，搵日呀！」

老友張敬軒首度擔正賀歲片男主角，祖兒亦會抽空捧場，談到對方有裸跑戲，她愕然說：「真係㗎？之前睇演唱會見佢Pat Pat好翹，原來為套戲練臀，冇諗過新年流流有得賞月！（佢想做千萬票房男星？）冇難度，希望佢喺票房攞到好成績，跟住攞金像獎影帝，都想合作拍戲，咩片種都好。」對於好姊妹鍾欣潼減磅變回索女，祖兒笑說：「佢終於醒番，搵番條腰！我最後一次見佢時同佢講，唔好畀條腰走，咁靚，佢話終於明白，依家簡直索爆啦！」