自覺已到適婚年齡 同吳卓羲好混亂 菊梓喬：想開心啲！

感情方面，她與緋聞男友吳卓羲的關係備受關注，有指她去年秘密北上會情郎，問到感情可有阻滯？她笑說：「我想開心啲囉！我想有人令我開心啲，令我快樂啲。（點形容同吳卓羲嘅關係？）都係咁囉！（冇進展？）唔知喎！我都唔知呀！我都好混亂。（冇安全感？佢太靚仔？）我不嬲都冇安全感，關咩事呀！」

新一年她想行桃花運，因為任何行業都想桃花盛放，她說：「人緣好，所有嘢都好。（舊年桃花唔好？）麻麻哋，可以好啲，我覺得最緊要開心，工作又好，都唔想困喺度，好似行唔到、停唔到嘅一個狀態，我想行得順啲。」

問到師傅可有對她的感情事贈言？Hana說：「我係一個重情嘅人，師傅話重情嘅人，你嘅情通常比較深厚，好少曇花一現嗰啲，都OK嘅，Keep住對人好，人哋都會對你好。」相士曾指她偏向年紀大才結婚，她說：「過咗30歲已經係，都係呢啲年紀。」她認為感情事冇得強求，至於可會考慮「雪卵」？她笑說：「冇做呢啲嘢噃！我覺得我身體都偏後生，OK嘅！」