獨家專訪：事業大豐收 虎盡「金」來 姚焯菲學做唱作人 炎明熹向紅館進發

炎明熹由《聲夢傳奇》三料冠軍到成為樂壇耀眼新星，還將登陸被喻為春晚之最的「央視春晚」，年僅17歲的她絕對厲害！去年Gigi捉緊黃金機會，花4個月時間參與內地節目《聲生不息》，結果成功彈起，衝出香港開拓內地市場，從此「聲」價十倍，「錢」途無限！

回顧虎年，無論人氣及工作量可算是「雙贏」，提到憑《聲》爆紅，她接受本報專訪時坦言從沒想過：「好榮幸，我心態係去攞經驗，冇諗過同啲前輩認識到，開始時見到佢哋會好緊張，其實我只係Solo唱過兩次，其他都係合唱，好開心有呢個機會。（憑節目得到咁多，有冇咩失去？）失去同朋友相處時間，但同時獲得同家人嘅時間，真係好奇妙。（接好多內地工作？）冇數過，有啲商演，不過工作相對係香港比較多。（做人氣王壓力大？）反而係動力，以前比較擔心，唔識同Fans溝通，原來佢哋好友善，成日喺台下歡呼畀勇氣我。」

談到兔年大計，Gigi不諱言寄望能開紅館騷：「演唱會可以同大家見面，仲可以唱自己想唱嘅歌，但前提要裝備好先，要踏上呢個舞台要準備好多嘢，例如體能同歌曲上，我好似歌都未夠，體能亦要增強好多，否則咩都未準備好時，好似浪費咗大家嘅時間、金錢。」為朝目標進發，她早前不斷觀賞前輩的演唱會，從中吸收經驗。問到自覺有何不足之處？她說：「好多嘢都未試，有啲人仲未鍾意我唱歌，所以要改良，要改到每個風格都有唔同人鍾意就好喇！」

去年收入大增，孝順的她笑指已給姑媽一筆錢，作為轉給祖父母的紅包，新年亦如願返家鄉，與長輩及家人度歲，問到是否距離置業又邁進一大步？她說：「買樓係屋企人教，因為可以揸住。（儲好首期？）以前小學儲儲埋埋都可以。（買幾大？）100萬呎，哈哈！其實3房2廳，買到層樓已經好犀利。」

至於姚焯菲於農曆新年後便出發往新西蘭升學，早前相約鍾柔美（Yumi）聚會，由於當日Gigi不在港、Windy亦有工作在身，故組合After Class始終都未能齊人。Chantel表示若有假期會回港，因為知道「小菲象」（Fans團名稱）會掛念她：「我有睇粉絲嘅留言同卡，好多謝粉絲明白我嘅決定，雖然有啲會覺得我呢個時候離開唔太好，但大部分都支持我，知我係去學習，最感動係有人話會支持我任何決定，知道我會做到最好。」她表示會多拍Vlog，分享當地的生活近況，笑言會盡量拍長一點。

Yumi對Chantel即將離港感不捨：「始終After Class四個好似糖黐豆，唔齊人覺得少咗啲嘢。不過相信After Class唔會散，唔使太擔心。」她們透露Windy亦有意到內地報讀音樂學院，將來豈不只剩Yumi一個在港？她說：「佢哋去讀書要學識獨立，自己都要。不過科技發達，就算唔喺我身邊，可以同佢哋facetime。」有指Chantel去新西蘭升學，跟當年陳慧嫻最紅時去美國讀書相似，她自己笑言聽過爹哋說，不過覺得時代轉變，網絡世界加添方便，不太擔心會被遺忘。

提到Gigi目標希望開紅館騷，Chantel亦視此為目標，但不會定限期，自知能力未夠，會好好學習，除了彈琴和唱歌外，亦有跟老師學編曲，將來到新西蘭會繼續遙距進修：「覺得自己有份參與創作嘅音樂係好特別。」她希望藉作品分擔自己的不開心，希望包辦曲詞，以英文歌為主。而Yumi覺得自己距離紅館舞台還需要更多汗水和時間，又指近年新人輩出，更加要增值自己，並表示最近重拾鋼琴、結他及色士風等樂器，希望將來能大派用場。