入行10年 尋求突破 陳瀅拍拖隨緣 爛桃花唔使恨

昨日在大埔出席活動的陳瀅，見台上置有假桃花的擺設，立刻圍着走一圈，希望兔年行桃花運。問到出道以來緋聞不斷，還需行桃花運？她笑說：「嗰啲係緋聞，爛桃花嚟！希望今年事業上有新嘗試，唔經唔覺入行10年，希望做多啲未試過嘅嘢，想創作一個有關環保嘅節目。」至於會否也希望在新一年拍拖？她說：「隨緣，有當然唔拘，如果冇嘅話，我諗今年會再養多隻狗，依家有3隻，一路都有再養嘅傾向，屋企最多可以容納到6隻。」

另外，陳瀅日前偕同閨蜜團「SÏXTERS」包括蔡思貝、吳嘉禧、賴慰玲及何雁詩，為陳嘉寶慶祝生日，到中環飯局兼夜蒲，陳瀅也說因工作忙平時少見：「但陳嘉寶老公好好，10月已經打畀我，叫我約齊人同佢出去食飯。（緬懷夜蒲的日子？）唔係，咁啱喺中環食飯，所以行吓，我哋都冇乜飲酒，佢哋有3個都做咗阿媽，唔夠12點已經散咗，趕住返去餵奶。」

至於賴慰玲則在社交平台分享聚會點滴，留言：「沒有人宣布懷孕要喜極而泣，沒有誰的難關要解決，無拘無束食吓燒肉滔滔不絕。」最難忘的是隨機走入一間酒吧，期間聽到有位路經的大叔說「30年後都要做好朋友呀」，令她們感動莫名，有人更忍不住哭出來，令網民瘋狂競猜是誰哭。至於蔡思貝則搞笑說：「咁31年之後點算？」