重金加盟英皇即接家人來港李幸倪轉「型」祖兒期待合作

李幸倪（Gin Lee）強勢加盟英皇，為寓意在樂壇重新出發，除了改形象、轉曲風外，在豐厚的「轉會費」支持下，更可接馬來西亞的家人居港，令她無後顧之憂，瞓身發展另一個事業高峰，連大師姐容祖兒、大師兄張敬軒亦期待跟這位「天后接班人」聯袂。

來自馬來西亞的Gin Lee早前被本報率先爆將簽約英皇，成為天后容祖兒、張敬軒後另一位唱將。前晚英皇在網上隆重宣布Gin成為家庭一分子，並大搞神秘感，將她打造成「影後」，只見原本烏黑長髮的她漂染成金髮，頭炮新歌《DUM DUM》MV中更分飾兩角，除了在12位dancers陪同下霸氣登場，又唱又跳，大晒舞功外，鏡頭一轉，身穿紅裙的她更「欣賞」化身打女的自己與人對打，整個MV充滿電影感。

至昨日Gin的新造型終全面曝光，一頭長金直髮，穿上黑色套裝，令人眼前一亮。入行12年的她表示，與英皇理念一致：「接觸過幾間公司，英皇誠意十足，同我嘅方向係最接近同清晰。」另一促成合作的原因，是公司給她100%自由度：「尤其喺音樂、形象上，完全信任我，令我好舒服，仲可以同好多唔同音樂單位合作，好有新衝擊！留意我嘅新歌，會有好大轉變。」她直言「轉會費」滿意外，公司更為她的工作度身訂造full package。

張敬軒想唱其創作

踏入新一年又投身新公司，Gin還作出了另一個重大決定，就是接家人來港居住，她說：「以往喺香港工作，都會擔心馬來西亞嘅屋企人生活成點？雖然會打電話、facetime，但始終唔喺佢哋身邊。佢哋嚟香港住，我就可以投放晒精神喺事業上。」她又指踏入英皇短短時間，已感受到滿滿的家庭溫暖，無論藝人或同事都很親切，所以期待跟同門合作：「無論喺音樂定電影上，好多識咗好多年，只係一直冇機會多啲交流。」

對於Gin重磅加盟，祖兒表示：「好開心公司又多一名猛將！我好欣賞佢，有留意佢嘅歌。」而張敬軒謂一直未有機會跟Gin合作，現終籌備合作大計，且知對方有作曲才華，期待可主唱她的作品。古巨基則讚Gin能唱能作，同樣在音樂上有機會聯承，而蔡卓妍為公司再添實力唱將而開心。