首當男一自創風格朱敏瀚例牌騷肌肉搏王敏奕緊張

上位小生朱敏瀚與王敏奕昨日為新劇進行拜神儀式，該劇是朱敏瀚首部男一之作，逢劇必脫衣的他做足準備隨時騷肌。兩人在劇中不乏親熱戲，王敏奕爆男方拍攝時表現緊張。

藝人朱敏瀚（朱仔）、王敏奕（Venus）、胡蓓蔚、袁文傑與林景程等，昨日出席無綫新劇《虛擬情人》的拜神儀式。首次擔正男一的朱仔表示以平常心看待：「冇畀位置影響心情，反而個角色好有挑戰性，呢套係AI（人工智能）劇，我唔係演正常人，係飾演AI。」又稱已拍完外景戲份，之前有參考其他AI題材的影視作品，擔心被指模仿，但現時覺得開創了新的AI戲路，拍出自己風格。

胡蓓蔚嫌袁文傑太高

而Venus飾演AI的創造者，為有完美情人而創造AI。問到與朱仔有否親熱戲？她笑言：「算有，但可能佢覺得好小事，佢有啲緊張，但我OK，套劇好純情。」雖然朱仔在劇中飾演AI，但仍逃不過脫衣騷肌的慣例，他說：「記得最後一日拍外景突然要我除衫，因為劇情講我去咗健身室。」Venus讚他隨時準備好騷肌。

至於胡蓓蔚表示剛續約無綫，但之前到了上海探親兩個月，一直未有時間簽約。她笑言跟袁文傑飾演夫妻，合作得好辛苦：「因為佢太高，我要着好高嘅高踭鞋襯番佢，我最期待就係坐喺度嘅戲，不過佢好有紳士風度。我同佢第一場戲就已經有少少激烈，兩夫妻有場大龍鳳。」

林景程失落「飛躍」零失望

至於失落男飛躍獎的林景程稱未有失望：「有人留意到我已經好開心，提唔提名事小，觀眾鍾意最重要。（林敏驄失落視帝有冇失望？）正如驄哥之前講『個人獎唔係最重要』，《下流》係應該攞最佳劇集，依家攞到係好大鼓舞。」